 Այսօր ԱԺ նիստում, երբ քննարկվում էր «Հեռուստատեսության եւ ռադիոյի մասին» և «Գովազդի մասին» ՀՀ օրենքներում լրացումներ և փոփոխություններ կատարելու մասին հարցը, ԱԺ ՀՅԴ խմբակցության պատգամավոր Արծվիկ Մինասյանը հայտարեց, որ ԱԺ-ն պետք է հետևողական լինի իր իսկ կողմից ընդունված օրենքների կատարմանը:
Հիշեցնենք, որ օրինագիծը հեղինակած մի խումբ պատգամավորներ առաջարկում են զանգվածային տեղեկատվության էլեկտրոնային միջոցներով թույլատրել թունդ ալկոհոլային խմիչնքների գովազդը` ժամը 22:00-ից մինչև 06:00-ն:
Արծվիկ Մինասյանի խոսքով` օրենքի հեղինակները չեն կարողանում ապացուցել հանրային շահը:
«Այս նախագիծը հակասում է ոչ միայն հանրային շահին, այլ նաև տեղական արտադրողի շահին: Մի քանի անձանց շահերի համար նման նախագի՞ծ են ընդունում, բայց այդտեղ հանրության շահ չկա, եթե ցույց տաք հանրային շահ, ես ներողություն կխնդրեմ»,- ասաց պատգամավորը:
ՀՅԴ պատգամավորի ներկայացմամբ` այս նախագիծը հասարակության ու տեղական արտադրողի շահերին հակասում է, փոխարենը մի խումբ անձանց են փորձում հարստացնել:
«Տեղական արտադրողի իրացման ծավալը Հայաստանում շատ փոքր է, մինչդեռ դրսից ներմուծված նույն օղիները, որոնք ֆինանսական մեծ հնարավորություններ ունեն, դուրս են մղելու տեղական արտադրողին: Բա ո՞ւր մնաց տեղական արտադրողին խարխուսելը, մնաց սառույցի՞ն»,- դժգոհեց նա:
ՀՅԴ խմբակցության անունից խմբակցության քարտուղար Աղվան Վարդանյանն առաջարկեց օրինագծի քննարկումն ու քվեարկությունը հետաձգել:
|
